Аддзел "Сцяжынка першая мая" расказвае аб гісторыі нашай школы. Першая школа ў вёсцы Валеўка была адкрыта ў 1869 годзе. Гэта было трохкласнае народнае вучылішча, у якім займалася 34 хлопчыкі і 1 дзяўчынка. Так было таму, што дзяўчынкі памагалі ў хатняй гаспадарцы. Першай настаўніцай была Окалава Юлія Юльянаўна, Закон Божы выкладаў святар Стракоўскі.

       У пачатку XX ст. народнае вучылішча ў Валеўцы было пераўтворана ў 3-х класную земскую школу. Школу наведвала 130 вучняў з Валеўкі і з навакольных вёсак.

       У 1922 годзе ў выніку таго, што Валеўка апынулася ў складзе Польшчы, тут была адчынена польская школа, якая працавала па 1939 г.

  У аддзеле прадстаўлены падручнікі розных гадоў і грыфельная дошка, на якой пісалі крэйдай, а гэта катомка з якой  хадзілі ў школу.   Вельмі прыгожа выглядалі дакументы аб заканчэнні школы.

   З 1951 года школа працавала як сярэдняя. У аддзеле прадстаўлены будынкі школы ў розныя гады, здымкі дырэктароў школы: з 1944 па 1949  год- дырэктарам школы працавала Лебедзева С.Н., з 1949 па 1951 г. Шчарбакоў П.М., з 1952 па 1959 – Скарабагацька В.М., з 1959 -1981 – Бондар В.П.

     З 1981 па 2014г. – дырэктар школы Санько Н.К. - выдатнік, асветнік Рэспублікі Беларусь. З 2014 па 2016 - Скобля І.М. Цяпер дырэктар школы - Хітро В.Я.

    Піянерская арганізацыя ў школе ўзнікла ў 1940 годзе.  У тым жа годзе ўзнікла камсамольская арганізацыя. 

    У 1955 годзе быў  заснаваны школьны гісторыка-краязнаўчы музей, якому ў 1968 годзе прысвоена званне “Народнага”.

    Высокую  ацэнку  сваёй дзейнасці атрымаў калектыў школы ў кнізе П.М.Машэрава – выдатнага дзеяча Рэспублікі Беларусь.

  Мы ганарымся тым, што ў нашай школе працавалі заслужаныя настаўнікі школ РБ: Петрыкевіч М.Ф., Ускоў В.П., Урбановіч У.А., якія з’яўляюцца арганізатарамі школьнага музея і Явоста Г.А. – настаўніца пачатковых класаў.

   Цэлым святам для вучняў і настаўнікаў школы быў стогадовы юбілей, гэтай падзеі наша раённая газета “Новае жыцце” прысвяціла цэлы нумар.

 Мы ганарымся вучнямі, якія закончылі школу з залатым медалём. Калектыў установы адукацыі неаднаразова быў          ўзнагароджаны граматамі і дыпломамі за плённую працу па розных напрамках педагагічнай дзейнасці.

     Мы сабралі здымкі ўсіх выпускнікоў школы, пачынаючы з 1953 года.

   Сёння дзяржаўная ўстанова адукацыі “Валеўскі вучэбна-педагагічны комплекс дзіцячы сад – сярэдняя школа” налічвае 105 вучняў і выхаванцаў.